Baipan Bhari Deva Movie Review

– अजिंक्य उजळंबकर

————————

आमचे सर्व अपडेट्स मिळविण्यासाठी फॉलो करा : फेसबुक I ट्विटर I इंस्टाग्राम

————————

Baipan Bhari Deva Movie Review

मित्रांनो किती दिवस झाले तुम्ही एखादा बरा मराठी सिनेमा पाहिलाय? जाऊ द्या. किती दिवस झाले तुम्ही एखादा उत्तम मराठी सिनेमा पाहिलाय? आठवत नाही. असो. मग सांगा किती दिवस झाले तुम्ही एखादा छान अथवा झक्कास मराठी सिनेमा पाहिलाय? राहू द्या. आता शेवटचं विचारतो किती दिवस झाले तुम्ही एखादा भारी… लै भारी मराठी सिनेमा पाहिलाय? सांगा सांगा. मला तर आठवत नाही की किती दिवसांपूर्वी मी बरा/उत्तम/छान या नंतर शेवटची कॅटेगिरी म्हणजे भारी या कॅटेगिरी मध्ये मोडणारा सिनेमा पहिला होता. मात्र आज खूप वर्षांनी हि इच्छा पूर्ण झाली. एक दिवस उशिराने का होईना. उशिरा म्हणजे चित्रपट काल प्रदर्शित झाला आणि मी आज शनिवारी पहिला. ट्रेलर बघताच क्षणी सोडायचा नाही असे ठरवले होते म्हणून एक दिवस उशीर झाला तरी गेलोच. असो. आधीच सांगतो आमच्या नेहमीच्या पद्धतीचा म्हणजे चित्रपटाची कथा, नावीन्य, विशेष काय, कुठे कमी पडलाय असा सगळा हिशोब मांडणारा हा रिव्युह नसणार आहे.

एक नव्हे, दोन नव्हे, तीन नव्हे तर तब्बल सहा बहिणी आहेत. प्रत्येकीची एक कथा आहे.. त्या प्रत्येक कथेत मनात सलणारी एक व्यथा पण आहे.. प्रत्येकीच्या व्यथेचे रूप जरी वेगळे असले तरी त्या व्यथेचे मूळ एकच आहे. आपल्या अवतीभोवतीच्या जवळच्या व्यक्तींमध्ये स्वतःला हरवून बसलेल्या असतात या सहाही जणी. कोण आहेत या सहा जणी हे मात्र मी तुम्हाला सांगेल मात्र काय आहे या प्रत्येकीची कथा आणि व्यथा हे मात्र इथे सांगत बसलो तर एकतर हि समीक्षा पण लांबेल आणि महत्वाचं म्हणजे सिनेमा बघण्याची तुमची मजा कमी होईल. कारण ती कमी न होऊ देणे जास्त महत्वाचे कारण हा सिनेमा तुम्ही बघणारच आहात याची मला खात्री आहे. तर कोण आहेत या सहा बहिणी? दोन मोठ्या बहिणी ज्या जुळ्या आहेत, त्या आहेत जया म्हणजे रोहिणी हट्टंगडी आणि शशी म्हणजे वंदना गुप्ते. या दोघींपेक्षा लहान असलेल्या इतर चौघींमध्ये अनुक्रमे साधना जी साकारली आहे सुकन्या कुलकर्णी ने, पल्लवी जी सादर केली आहे सुचित्रा बांदेकर ने, केतकी जी झाली आहे शिल्पा नवलकर आणि लास्ट बट नॉट लिस्ट चारू च्या भूमिकेत चमकली आहे दीपा परब. या सहा जणी म्हणजे ना सहा नग असतात नग. या सहाही जणींचं एकमेकींशी सख्ख्या बहिणीचं नातं आहे पण असं असलं तरी सहाही जणींचे तोंडं सहा वेगवेगळ्या दिशेला. पण एक निमित्त घडते आणि या सहाही जणी एकत्र येतात एका मंगळागौर स्पर्धेत भाग घेण्यासाठी. हो..साठी, पन्नाशी आणि चाळीशीत असलेल्या या सहा जणी या आजी/आई च्या वयात भाग घेतात एका मंगळागौर स्पर्धेत. भाग घ्यायला प्रत्येकीला कुठल्या ना कुठल्या अडथळ्याची शर्यत पार करून यावी लागणार असते. पण तरीही त्या एकत्र येतात. कारण त्यातील प्रत्येकीच्या मनात जी व्यथा आहे, त्यातून बाहेर कसे पडायचे, स्वतःला सिद्ध कसे करायचे, स्वतःसाठी वेळ कसा द्यायचा… थोडक्यात स्वतःसाठी जगायचे कसे याचे एक निमित्त त्यांना हवे असते.. आणि ते निमित्त असते ही मंगळागौर स्पर्धा आणि ती जिंकून त्यांना आपल्या आजूबाजूच्या जवळच्या नात्यातल्या प्रत्येकाला एक उत्तर द्यायचे असते. हे उत्तर तर या सहा जणी देतातच पण अखेरीस त्यांच्या हाती एक वेगळीच गोष्ट लागते व ती म्हणजे त्यांचे आपसात असलेले, प्रेमाचे नाते. जे वर्षानुवर्षे काही क्षुल्लक कारणांमुळे, स्वभावामुळे, जिद्दीमुळे, हट्टामुळे हरवून गेलेले असते. सहाही जणी मग अखेरीस कडकडून एकमेकींना मिठी मारतात आणि म्हणतात बाईपण भारी देवा.

काय समीक्षण करावं या सिनेमाचं? सॉरी या कलाकृतीचं. हो … हा सिनेमा नाही ही एक अप्रतिम जमलेली अशी कलाकृती आहे. मी तर म्हणेल मास्टरपीस. आणि मास्टरपीसचं समीक्षण करून त्यातील उणिवा नसतात शोधायच्या. निदान मला तरी हे शक्य होत नाही. काही सिनेमे ऑन्ली फॉर ऍडल्टस असतात, काही सिनेमे ऑन्ली फॉर चिल्ड्रेन असतात, खूप सारे सिनेमे पुरुषप्रधान असतात तर काही फेमिनिस्ट असतात. फेमिनिस्ट म्हणजे स्रीमतवादी. पण बाईपण भारी देवा हा वरवर दिसायला जरी तुम्हाला फेमिनिस्ट वाटत असला ना तरी तो ऍक्च्युअली तसा नाहीये. कारण टिपिकल फेमिनिस्ट चित्रपटात ना, कथेच्या अंती नायिकेला, उठ, संघर्ष कर, अथवा घे ते हत्यार हातात आणि लढ तुझी लढाई.. तुझ्यावर होणाऱ्या अन्यायाविरुद्ध पेटून उठ असले मेसेज देणारे असतात. म्हणजे असले मेसेज चुकीचे असतात असे मला अजिबात नाही म्हणायचे. पण बाईपण हा मात्र त्या टिपिकल फेमिनिस्ट वाटेने जाणारा सिनेमा नाही. एका मराठमोळ्या, मध्यमवर्गीय आणि संस्कारी घरातील, रूढी परंपरा पाळणाऱ्या स्त्रीने तिच्यावर असलेल्या जबाबदाऱ्या सांभाळत, तिच्यातल्या स्त्रीला स्वतःसाठी एकदा ओ म्हणायला लावणारा हा सिनेमा आहे. सासऱ्याने त्याच्या सुनेशी अथवा नवऱ्याने आपल्या पत्नीशी कसे वागावे एवढ्यावर न थांबता, या सहा बहिणींच्या नात्याच्या निमित्ताने हा सिनेमा एका स्त्रीने दुसऱ्या स्त्री शी कसे वागावे आणि वागू नये ते नकळतपणे शिकवून जातो हे विशेष.

वैशाली नाईक यांनी लिहिलेली जिचे सहलेखन केले आहे केतन पाडगावकर आणि निखिता कानुंगो यांनी, ही उत्कृष्ट कथा, असून त्याला दिलेल्या कौटुंबिक भावनांच्या मुलाम्यामुळे तुम्ही चित्रपटभर डोळ्यात असू नाहीतर गालावर हसू या दोनच एक्सप्रेशनमध्ये कॉन्स्टन्ट असता.पटकथा वैशालीनेच लिहिली आहे जी अक्षरशः वाऱ्याच्या वेगाने पळत राहते आणि तुम्हाला क्षणभरसुद्धा विचार करायला वेळ मिळत नाही. प्रत्येक व्यक्तिरेखेत आपण असे काही एकरूप आणि दंग होऊन जातो की बस्स. म्हणजे सहा बहिणींच्या सहा कथा आहेत, पण असं वाटतं की यातील प्रत्येक पात्र आपल्या अवतीभोवती आपण कधी ना कधी आणि कुठे ना कुठे तरी पहिले आहे. मंगळागौरी स्पर्धेची तयारी आणि त्याच्या समांतर चालणाऱ्या या सहा बहिणीच्या सहा कथा यामुळे चित्रपट एक सेकन्ड बोर होऊ देत नाही. वैशाली सोबत ओंकार दत्ता याने लिहिलेले संवाद एकदम भारी. अभिनयाच्या बाबतीत काय बोलावे. सहाच्या सहा जणी मुळात अत्यंत प्रतिभासंपन्न कलाकार आहेत. वंदना गुप्ते लाजवाब. रोहिणी हट्टंगडी अत्यंत संयमित आणि छान. सुकन्या कुलकर्णी अत्यंत सहज आणि प्रेमात पाडणाऱ्या. सुचित्रा बांदेकर उत्कृष्ट. शिल्पा नवलकर आणि दीपा परब एकदम झक्कास. यांच्यासोबत शरद पोंक्षे, तुषार दळवी, सुरुची आडारकर आणि इतर सर्वच कलाकारांनी आपापली भूमिका मस्त साकारली आहे. केदार शिंदे यांचे दिग्दर्शन एकदम भारी. निव्वळ भारी. दिग्दर्शनसोबतच त्यांनी या सर्व कलाकारांकडून जे काम काढून घेतले आहे त्याला तोड नाही. मुळात प्रत्येक पात्रासाठी निवडलेले कलाकार इतके परफेक्ट आहेत की जणू हा रोल त्यांच्याशिवाय इतर कोणीच करू शकणार नाही असे वाटते. साईप्रसाद निंबाळकर आणि पियुष कुलकर्णी उर्फ साई-पियुष या जोडीने दिलेले संगीत धम्माल आहे. नेत्रदीपक छायांकन, क्रिस्पी अशी एडिटिंग म्हणजे संकलन, परफेक्ट नृत्य दिग्दर्शन आणि प्रभावी असे पार्श्वसंगीत हे म्हणजे चेरी ऑन दि केक असल्यासारखे आहेत.

सिनेमा बघावा की नाही आहे मुळात प्रश्नच नाहीये इथे. अजिबात न चुकवावी अशी हि कलाकृती थिएटरमध्ये च जाऊन बघावी हे सांगणे आहे तेही घरातील, कुटुंबातील प्रत्येक स्त्री मग ती आई असो, आजी असो, बायको असो वा बहीण असो या सगळ्यांना सोबत घेऊन. घरी आल्यावर बघू असा विचार करून आपणच आपल्या मराठी चित्रपटसृष्टीचं नुकसान करीत असतो. फुल्ल्टू धमाल मनोरंजन आणि सोबत हळवा असा भावनिक संदेश देणाऱ्या या कलाकृतीला महिलावर्ग डोक्यावर घेणार हे नक्की.

सुपर डुपर हिट. ४ स्टार आउट ऑफ ५.

इतर हिंदी चित्रपट परीक्षणांसाठी क्लिक करा