Badhaai Do Movie Review बधाई दो

विनोदी पद्धतीने वाटचाल करणारी चित्रपटाची कथा-पटकथा आहे हर्षवर्धन कुलकर्णी, सुमन अधिकारी व अक्षत घिल्दियाल यांची. एक बाब सुरुवातीलाच मान्य करावी लागेल की ही कथा सांगतांना कथाकाराचा अथवा दिग्दर्शकाचा उद्देश या कथेच्या आडून कुठलीही उत्तान दृश्ये, कामुक दृश्ये, अनैसर्गिक संभोग दृश्ये दाखविणे हा अजिबात नाहीए आणि त्याचा चित्रपटात शून्य वापर आहे. संवादांमध्ये अनुपस्थित असलेली शिवीगाळ सुद्धा अशात दुर्मिळ झाली आहे. आज ओटीटी जगतात जिथे अशा उत्तान दृश्य दाखविण्याच्या एकमेव उद्देशाने  कथानकं लिहिली जातात असे असूनही कथाकार व दिग्दर्शक मंडळींनी कमालीच्या संयमाने व अत्यंत प्रगल्भतेने हा विषय मांडला आहे जे खूपच कौतुकास्पद आहे. आक्षेपार्ह असे एकही दृश्य सिनेमात नाही. जे दाखवले आहे ते केवळ सांकेतिक. खरंतर हंटर च्या हर्षवर्धन कडून असे अजिबातच अपेक्षित नाही. त्यात एक पाऊल पुढे म्हणजे चित्रपट पाहिल्यावर हेसुद्धा स्पष्ट होते की कथाकार आणि दिग्दर्शकाला यातून केवळ एलजीबीटी कम्युनिटी ला सोसावा लागणारा सामाजिक बहिष्कार, त्यांची होणारी घुसमट, कुटुंबातून न मिळणारा सपोर्ट या मुद्द्यांना अधोरेखित करून प्रेक्षकांसमोर आणायचे आहे. थोडक्यात हेतू चांगला आहे व त्याला अनुसरून कथानकाचा शेवट करण्यात आलाय.