डेव्हीड धवन. ९० च्या दशकातील मसाला व्यावसायिक सिनेमा दिग्दर्शकांमधील आघाडीचे नाव. कॉमेडी हा त्यांचा हुकुमी एक्का. आज डेव्हीडजींचा वाढदिवस. डेव्हीडजींचे खरे नाव आहे राजिंदर धवन. मूळचे लुधियाना, पंजाबचे. अगरतला (त्रिपुरा) येथे पंजाबी कुटुंबात जन्मलेले डेव्हीड यांचे बारावीपर्यंतचे शिक्षण मात्र कानपूर येथे झाले. डेव्हीड यांचे वडील बँकेत नौकरीला असल्याने व त्यांची कानपुर येथे बदली झाल्याने धवन कुटुंबियांना अगरतला येथून कानपूरला शिफ्ट व्हावे लागले होते. त्यांच्या शेजारी एक ख्रिश्चन कुटुंब रहायचे जे राजिंदर ला लाडाने डेव्हीड नावाने संबोधित करत. पुढे जाऊन जेंव्हा राजिंदर धवन यांनी फिल्म टेलिव्हिजन इन्स्टिट्यूट मध्ये प्रवेश घेतला तेंव्हा त्यांनी आपले नाव बदलून डेव्हीड धवन असे केले, ज्या नावाने नंतर बॉलिवूडमध्ये यशाचा झेंडा रोवला.
